Wanneer God jou vra om stil te bly: Gehoorsaamheid in die geheime seisoene

Daar is tye in die lewe wanneer God jou nie roep om te praat nie — Hy roep jou om stil te bly. Nie omdat jy niks het om te sê nie, maar omdat Hy besig is om dinge agter die skerms te rangskik op maniere wat jy nie kan verstaan nie.

In Maart het ek van Gqeberha na Jeffreysbaai verhuis. Op die oppervlak het dit soos ’n eenvoudige skuif gelyk — ’n nuwe dorp, ’n nuwe ritme, ’n nuwe hoofstuk. Maar nou, wanneer ek terugkyk, sien ek hoe elke stap, elke wagperiode, elke teleurstelling eintlik deel was van God se dans. Ek sê “dans”, want Hy het die passes perfek uitgewerk — selfs toe ek nie die musiek kon hoor nie.

Ek onthou hoe ek verlede jaar in Maart gekortlys is vir ’n pos in die burgemeester se kantoor. Ek het hoopvol gewag, gebid, en toe ek nkks hoor na die onderhoud nie, het ek geweet rk was onsuksesvol. Ek het net stil gebly. Ek het geweet ek moes nie stry met God se “nee” nie. Soms is gehoorsaamheid nie om te doen nie — dis om te laat gaan.

Sewe maande later, onverwags, kry ek ’n oproep oor 'n ander pos in die munisipaliteit — dié wat ek nou met dankbaarheid beklee. Toe besef ek weer: die passies was nie deur my uitgewerk nie. Dit was God se hand, nie my plan nie.

Maar hier is die deel wat min mense verstaan: om God te gehoorsaam beteken soms om dinge privaat te hou. Nie uit trots of geheimhouding nie, maar omdat sekere dinge nie bedoel is om in die openbaar te ontkiem nie. Party seisoene van jou lewe is saad-seisoene — God plant iets diep in jou, en as jy dit te gou blootlê, kan dit verdor.

Mense sal dalk vra: “Hoekom sê jy niks?” of “Wat gaan aan?” En jy sal dalk voel jy skuld hulle antwoorde. Maar jy skuld net gehoorsaamheid aan God. Wanneer Hy sê “Wees stil en weet dat Ek God is” (Psalm 46:10), is dit nie net ’n mooi vers nie — dis ’n uitnodiging tot vertroue.

God werk dikwels in stilte. Hy vorm, Hy skuif, Hy berei voor. En as jy Hom toelaat om jou lewe se dans te lei, sal jy agterna sien dat selfs jou stilte deel van Sy simfonie was.

So, as jy in ’n seisoen is waar jy dinge privaat moet hou, moenie skaam voel nie. Jy is besig om God te gehoorsaam. En gehoorsaamheid is soms stiller, maar altyd heilig.

Mooi loop

Roslyn